شاعر : وحید سلطان زاده چایکندی
رتبه: اول
بخش : اصلی تک اثر ترکی
استان: آذربایجان شرقی
گونوز داریخمالیدیر، گون باتان داریخمالیدیر
یامان گونه قالاسان داغ، هاوان داریخمالیدیر
ائله دوشوب سنه قارقیش، بو طیلسیم اوجقاردا
چیچک داریخمالیدیر…آخ، تیکان داریخمالیدیر
بوساطیمیز دا چاخیر یوخدو، قان دولوب چاناقا
بویور دییَردیم آما لاختا قان داریخمالیدیر
ایچَک بو شئه چمن اوسته بنوشه ساغلیغینا
بو ساغلیقایله دولان ایستیکان داریخمالیدیر
ایچیمده بیر دلی قوردون غریبلیگی اولاییر
بو یالقوزاق اولایاندان دومان داریخمالیدیر
هله بو دُوشلری چِئینیر قوروقچولار سوروسو
اوجاقلاری داغیدان بو تالان داریخمالیدیر
وطن داریخمالیدیر غوربتین آلیم قاداسین
بو غوصه سوزجویون آلقیشلامان داریخمالیدیر
شِئعیر چاناقلاریمیزدان زَهَر دامیر ایچیمه
غزل دوشونده یاتان بُوز ایلان داریخمالیدیر
***
نه اوچماقی باجاریر نه قاچیر پیشیکلردن
یاغیش دا کورپه گوورچین یامان داریخمالیدیر…
شاعر : فیض اله بختیاری
رتبه: دوم
بخش : اصلی تک اثر ترکی
استان: آذربایجان شرقی
سؤزوم یازیمدا بوغولدو قارالدی بایرام عمی
ائلیم اوبام قیشا دؤندو نه حالدی بایرام عمی
یاغیش یاغاندا بیزیم دام گؤزون سیخیر باشیما
ایچیمده گؤرنه سایاق قالماقالدی بایرام عمی
قارانقوشون سسینه آچمیشام اوره ک قاپیسین
سنی چیچک گوله جکدیر!! ماحالدی بایرام عمی
نه قیش قوووردو منی نه سازاق نه قارلی گئجه
منی اوره ک یاراسی مندن آلدی بایرام عمی
داغیلمیشام کوچه لردن ایزیم پوزولمادادیر
آیاق سسیم کورا یوللاردا قالدی بایرام عمی
زامان زامان دومانین آغریسین گونش قاناجاق
قوجاق قوجاق یاشیل آرزیم سارالدی بایرام عمی
سنین گلیش یولونا پرده چکدیگیم گئجه دن
سطیر سطیر غزلیم فیکره دالدی بایرام عمی
دوواردان آسلادیغیم لال سازین کؤکون قوراراق
ایچیمده بیر کیشی بیردن قوجالدی بایرام عمی
دونن گئجه سنی دؤزدوم قارآلدی قاپ باجانی
اریک آغاجلارینی شاختا چالدی بایرام عمی
آماندی گلمه بیزیم بوردو قارقالار تالاییب
یازیمدا بایرام اؤزو مین سووالدی بایرام عمی
شاعر : مهدی میرزا رسول زاده
رتبه: سوم
بخش : اصلی تک اثر فارسی
استان: اردبیل
دونیانی دولدوروب دره، داغلار نئجولدولار؟
بایراملار اولدولار قره، آغلار نئجولدولار؟
نوودانلارین گؤزو نه قهدهر گؤزلسین یاغیش؟
یئرگؤی عطشده یاندی، بولاقلار نئجولدولار؟
گوللر تیکانلاماقدا، آغاج بالتا ساپلاییر
گؤمگؤی چمن هایاندادی؟ باغلار نئجولدولار؟
کوللوکلرین دؤشونده شههرلر بوی آتدیلار
دربندده اذانلی شافاقلار نئجولدولار؟
اولدوز هانی؟ نه گلدی آیا؟ گون نه گوندهدی؟
کیم سالدی ظلمتی؟ دئه چیراقلار نئجولدولار
هئچ کیمسه اوینامیر کوچهده گون باتان چاغی
آتگزدیرن شولوغچو اوشاقلار نئجولدولار؟
دیوانهلر شهههرده گزیرلر قاطارقاطار
عاقللره نه گلدی؟ به ساغلار نئجولدولار؟
زولفون ندندی بویله پریشان ائلین قیزی؟
آینان هایاندا سیندی؟ داراقلار نئجولدولار؟
«تلبت»ده سئوگیدیر گئجه «دانلود» اولور داها
نازلی باخیش، حیالی قوجاقلار نئجولدولار؟
حراج اولور بازاردا سارای، خانچوبان دانیش
ناموسدان اؤترو قورقو یاساقلار نئجولدولار؟
هاممی قوجالدی، بس نیه شیطان قوجالمادی؟
حقین یولوندا گوجلو آیاقلار نئجولدولار؟
چاتدی غزلده سؤز سونا آنجاق اوزوم قره
سیز بلکه بیلدینیز اوزو آغلار نئجولدولار؟